တက္ကစီအငှားယာဉ်မောင်းတစ်ဦး အင်းစိန်လမ်းမပေါ်မှာ ထိုးသွင်းဒဏ်ရာ၊ ပြတ်ရှဒဏ်ရာများနဲ့သေဆုံးနေ

 ရန်ကုန်၊ဇန်န၀ါရီ ၁၅။ ။အင်းစိန်လမ်းမကြီးပေါ်မှာ တက္ကစီအငှားယာဉ်မောင်းတစ်ဦး ဇန်န၀ါရီလ ၁၄ရက်နေ့ ညပိုင်းက ထိုးသွင်းဒဏ်ရာ၊ ပြတ်ရှဒဏ်ရာများနဲ့သေဆုံးနေပါတယ်။ မြောက်ပိုင်းခရိုင်ရဲတပ်ဖွဲ့မှတာဝန်ရှိသူတစ်ဦးက”အနေအထားကတော့ ရန်ဖြစ်ပြီးသေဆုံးတဲ့အနေအထားပါ။သေဆုံးတဲ့သူက တက္ကစီယာဉ်မောင်းဖြစ်တယ်။ အခင်းမဖြစ်မှီ သေဆုံးသူက သူ့ဇနီးဆီဖုန်းဆက်ပြီး ယာဉ်တစ်စီးနဲ့ညှိထားတယ်။ လျှော်နိုင်တဲ့ အဆင့်မရှိဘူးလို့ပြောတယ်။ အနီးနားကပတ်ဝန်ကျင်ပြောပြချက်အရ ကားသမားနဲ့ရန်ဖြစ်နေတာတွေ့တယ်။ ရိုးရိုးသားသားရန်ဖြစ်နေတာထင်တာ။နောက်တော့တစ်ယောက်ကထွက်ပြေးသွားတယ်။ တစ်ယောက်ကဓားဒဏ်ရာတွေနဲ့ငုတ်တုတ်လေးထိုင်ပြီးလဲသွားတယ်။ ထိုးတဲ့အကောင်က မရမ်းကုန်း(၃)ရပ်ကွက်ကိုထွက်ပြေးသွားတယ်။သေဆုံးသူက တစ်ဖက်ကားလမ်းကိုပြေးတယ်။”လို့ပြောပါတယ်။

ကျူးလွန်သူအသုံးပြုသွားတယ်လို့ယူဆရတဲ့ သွေးစွန်းနေတဲ့ ဓားတစ်ချောင်းကို မရမ်းကုန်းမြို့နယ်၊ (၃)ရပ်ကွက်၊ အေးငြိမ်းသာလမ်းအနီးမှာ တွေ့ရှိတယ်လို့သူကဆက်ပြောပါတယ်။ ရန်ကုန်တိုင်းဒေသကြီး၊ မရမ်းကုန်းမြို့နယ် (၃)ရပ်ကွက်၊ အင်းစိန်လမ်းမပေါ်၊ မရမ်းကုန်း အထက(၂)ကျောင်းအနီး အငှားယာဉ်မောင်းအမျိုးသားတစ်ဦး ထိုးသွင်းပြတ်ရှဒဏ်ရာများနဲ့ သေဆုံးနေတာဖြစ်ပါတယ်။ တိုယိုတာ ကိုရိုတာ အမျိုးအစားအငှားယာဉ်ဟာ သမိုင်းလမ်းဆုံဘက်မှ အင်းစိန်လမ်းမကြီးအတိုင်း မောင်းနှင်လာကာ မရမ်းကုန်း အထက (၂)ကျောင်းနားအရောက်မှာ လမ်းလယ်ကျွန်းပေါ်ရပ်တန့်သွားခဲ့ပြီး ဒဏ်ရာများနဲ့ အမျိုးသားတစ်ဦးထွက်လာခဲ့တယ်လို့ ပတ်ဝန်ကျင်ပြည်သူများပြောပြချက်အရသိရတယ်လို့ မြောက်ပိုင်းခရိုင်ရဲတပ်ဖွဲ့ထံကသိရပါတယ်။ သေဆုံးသူအမျိုးသားဟာ ရမ်ကင်းမြို့နယ်မှာနေထိုင်တဲ့ ဦးထွန်းထွန်းလင်း အသက် (၄၂)နှစ်ဖြစ်ပါတယ်။ ဦးထွန်းထွန်းလင်းဟာ ထိုးသွင်းဒဏ်ရာ ၅ချက် နဲ့ ပြတ်ရှဒဏ်ရာများရရှိပြီး သေဆုံးသွားခဲ့တာဖြစ်ပါတယ်။ ဦးထွန်းထွန်းလင်းသေဆုံးမှုနဲ့ပတ်သက်ပြီဲး အင်းစိန်မြို့မရဲစခန်းမှ (ပ)၁၄၁/၂၀၁၇ ရာဇသတ်ကြီးပုဒ်မ ၃၀၂နဲ့ အမှုဖွင့်ထားကာ ပြစ်မှုကျူးလွန်သူကိုဖမ်းဆီးရမိရေးစုံစမ်းနေပါတယ်။

 

Author / နှင်းနှင်း