“ငလျင် လှုပ်ရှားမှု ရစ်(ခ်)တာစကေး လျော့နည်းလာ ပြင်းထန်တဲ့မြေငလျင်တွေလှုပ်ဖို့ခဲယဉ်း”

 နေပြည်တော်၊ ဇန်နဝါရီ ၁၂ ရက်။ ။ သည်ကနေ့ မနက်ပိုင်းက လှုပ်ရှားသွားခဲ့တဲ့ မြေငလျင်နဲ့ ပတ်သက်ပြီး နောက်ဆက်တွဲ အင်အားအနည်းငယ်ရှိတဲ့ ငလျင်တွေ ရှိလာနိုင်ပေမယ့် အင်အားပြင်းထန်တဲ့ မြေငလျင်ကြီးတွေတော့ အခုလောလောဆယ်မှာ ထပ်လှုပ်ဖို့ ခဲယဉ်းသေးတယ်လို့ မိုးလေဝသနှင့် ဇလဗေဒ ညွှန်ကြားမှုဦးစီးဌာနမှ သိရပါတယ်။ ယင်းဌာနမှတာဝန်ရှိသူတစ်ဦးက ‘အခုက အင်အားအသင့်တင့် လှုပ်ထားတာဆိုတော့ လောလောဆယ်မှာ အင်အားပြင်း ငလျင်အကြီးကြီးတွေ မလာနိုင်သေးဘူး၊ လောလောဆယ် ထပ်လှုပ်ဖို့တော့ ခဲယဉ်းသေးတယ်’လို့ ပြောပါတယ်။

သည်ကနေ့ မနက် (၁) နာရီ (၁၄) မိနစ် အချိန်ထိ အင်အား( ၅.၃) နဲ့ လှုပ်ရှားမှု သုံးကြိမ် လှုပ်ခဲ့တာကြောင့် ငလျင်ကြီး တစ်ခုရဲ့ ရှေ့ပြေးငလျင်လှုပ်ရှားလို့ စိုးရိမ်ခဲ့ကြပေမယ့် လက်ရှိမှာတော့ လှုပ်ရှားမှု ရစ်(ခ်)တာစကေး လျော့နည်းသွားခဲ့ပြီ ဖြစ်ပါတယ်။ ဒါပေမယ့် သည်နေ့မနက် (၁၀)နာရီ (၄၆)မိနစ် (၀၄)စက္ကန့် အချိန်မှာ ကမ္ဘာအေး မြေငလျင် စခန်းမှ မြောက်ဘက် (၁၀၃)မိုင်ခန့် ကွာဝေးသော မြန်မာနိုင်ငံပြည်တွင်း (ဖြူးမြို့၏ အနောက်တောင်ဘက် (၂၁) မိုင်ခန့် အကွာ)ကို ဗဟိုပြု၍ အင်အားရစ်(ခ်)တာစကေး (၄.၆)အဆင့်ရှိ အင်အား အနည်းငယ်ရှိသော မြေငလျင်တစ်ခု ထပ်မံလှုပ်ခတ်သွားတယ်လို့ မိုးလေဝသနှင့်ဇလဗေဒဦးစီးဌာနက ထုတ်ပြန်ပါတယ်။

‘ ငလျင်ဗဟိုပြု နေရာက ပဲခူးရိုးမအတွင်းမှာ လှုပ်တာဆိုတော့ အပျက်အစီး သက်သာတာပေါ့။ ဖြူးမြို့ထဲမှာ ဗဟိုပြုခဲ့ရင်တော့ အပျက်အစီးများသွားနိုင်တာပေါ့’ လို့ မိုးလေဝသနှင့် ဇလဗေဒ ညွှန်ကြားမှုဦးစီးဌာနမှ လက်ထောက်ညွှန်ကြားရေးမှုး တစ်ဦး က ပြောပါတယ်။ ဖြူးမြို့အနောက်ဖက် ပဲခူးရိုးမအတွင်း ပမာဏ ၆.၀ငလျင်လှုပ်ပြီး မိနစ်အနည်းငယ်အကြာ ၅.၃ ပမာဏ နောက်ဆက်တွဲငလျင် ၃ခု လှုပ်ခတ်ခဲ့တယ်လို့ငလျင်ကော်မတီက ထုတ်ပြန်ပါတယ်။ ထိုအနီးနားမှာ ဖြူးဆည်၊ ကွန်းချောင်းတမံတွေရှိနေပါတယ်။နောက်ဆက်တွဲငလျင်များ သတိထားရန်လိုအပ်တယ်လို့လည်းထည့်သွင်းထုန်ပြန်ပါတယ်။ ၂၀၁၈ ခုနှစ်၊ ဇန်နဝါရီလ (၁၂)ရက်နေ့၊ မြန်မာစံတော်ချိန် (၀၀)နာရီ၊ (၅၆)မိနစ်၊ (၂၃)စက္ကန့် အချိန်တွင် ကမ္ဘာအေးမြေငလျင်စခန်းမှ မြောက်ဘက် (၁၀၇)မိုင်ခန့် ကွာဝေးသော မြန်မာနိုင်ငံပြည်တွင်း (ဖြူမြို့၏ အနောက်-အနောက်တောင်ဘက် (၁၇)မိုင်ခန့်အကွာ)ကို ဗဟိုပြု၍ အင်အားရစ်(ခ်)တာစကေး(၆.၀)အဆင့်ရှိ အင်အားအသင့်အတင့်ရှိသော မြေငလျင်တစ်ခု လှုပ်သွားတယ်လို့ မိုးလေဝသနှင့်ဇလဗေဒဦးစီးဌာနက ထုတ်ပြန်ပါတယ်။

 

Author – အောင်မင်းသိန်း