The Kumudra Journal

၂၀၁၇ – ၂၀၁၈ ဘဏ္ဍာနှစ်အတွင်း တိုင်းပြည် ဂျီဒီပီ ခုနစ်ရာခိုင်နှုန်းတိုးတက်ဖို့ သမ္မတ ဦးထင်ကျော် မျှော်မှန်း

နေပြည်တော်၊ ဇန်နဝါရီ ၈ – လာမယ့် ၂၀၁၇ – ၂၀၁၈ ဘဏ္ဍာနှစ် အမျိုးသားစီမံကိန်းမှာ နိုင်ငံရဲ့ GDP ကို ခုနစ် ရာခိုင်နှုန်းတိုး တက်ရန်နှင့် လူတစ်ဦးချင်းစီ စုစုပေါင်းထုတ်လုပ်မှုနှင့်ဝန်ဆောင်မှုတန်ဖိုး (Per CapitaGDP)ကို ကျပ် ၁၇ သိန်းကျော်ရရှိဖို့ မျှော်မှန်းထားတယ်လို့ နိုင်ငံတော်သမ္မတ ဦးထင်ကျော်က ပြောပါတယ်။
ယနေ့နံနက် ၁၀းဝ၀ နာရီမှာ နိုင်ငံတော်သမ္မတအိမ်တော်မှာကျင်းပခဲ့တဲ့ အမျိုးသားစီမံကိန်းကော်မရှင် (၁/၂၀၁၇)အစည်းအဝေးမှာ အဲသည်ကော်မရှင် ဥက္ကဋ္ဌလည်းဖြစ်တဲ့ သမ္မတဦးထင်ကျော်က အခုလိုပြောဆိုခဲ့တာပါ။
၂၀၁၆ – ၂၀၁၇ ဘဏ္ဍာနှစ်အတွက် နှစ်ကုန်ခန့်မှန်းခြေအရ GDP ၅.၇ ရာခိုင်နှုန်းတိုးတက်ဖို့ ခန့်မှန်းထားတယ်လို့လည်း သမ္မတက ပြောဆိုခဲ့ပါတယ်။
၂၀၁၇ – ၂၀၁၈ ဘဏ္ဍာနှစ် အမျိုးသားစီမံကိန်းမှာ ကဏ္ဍအလိုက်၊ ဒေသအလိုက် လတ်တလောဖြည့်ဆည်းပေးရန်လိုအပ်ချက် တွေနဲ့ ရေရှည်ဖွံ့ဖြိုးတိုးတက်ရေးအတွက်ဆောင်ရွက်သင့်တဲ့ လုပ်ငန်းစီမံကိန်းကြီးတွေကို နိုင်ငံတော်ကခွင့်ပြုနိုင်မယ့် ဘတ်ဂျက် ဘောင်အတွင်းက ပေါင်းစပ်ရေးဆွဲကြဖို့လိုအပ်တယ်လို့ သမ္မတ ဦးထင်ကျော်က မှာကြားခဲ့ပါတယ်။
တိုင်းဒေသကြီး၊ ပြည်နယ်အစိုးရတွေအနေနဲ့လည်း စီမံကိန်းများရေးဆွဲအကောင်အထည်ဖော်ရာမှာ နိုင်ငံတော်အစိုးရရဲ့ မူဝါဒ၊ လုပ်ငန်းစဉ်များအတိုင်းလိုက်ပါဆောင်ရွက်ရမှာဖြစ်တယ်လို့လည်း သမ္မတ ဦးထင်ကျော်က ပြောဆိုခဲ့တယ်လို့ နိုင်ငံတော်သမ္မတရုံး ဝန်ကြီးဌာနက ထုတ်ပြန်ပါတယ်။
၂၀၁၆ – ၂၀၁၇ ဘဏ္ဍာနှစ် ပထမခြောက်လပတ်အတွင်း နိုင်ငံရဲ့စီးပွားရေးတိုးတက်မှုနှေးကွေးခဲ့တာနဲ့ပတ်သက်ပြီးတော့လည်း နိုင်ငံတော်သမ္မတဦးထင်ကျော်ကအထူးသဖြင့် လယ်ယာသီးနှံများအထွက်ကျဆင်းခြင်း၊ ပို့ကုန်ဈေးနှုန်းများကျဆင်းခြင်း၊ နိုင်ငံခြားရင်းနှီးမြှုပ်နှံမှုစီးဝင်မှုနှေးကွေးခြင်းသည် အဓိကအကြောင်းအရင်းများ ဖြစ်ခဲ့ပါကြောင်း၊ ထို့အပြင်ကမ္ဘာ့နိုင်ငံများတွင် ဖြစ်ပေါ်ပြောင်းလဲလျက်ရှိသည့် နိုင်ငံရေး၊ မိမိတို့နိုင်ငံ၏ စီးပွားရေးကို အနည်းနှင့်အများဆိုသလို ရိုက်ခတ်လျက်ရှိပါကြောင်းလို့ပြောဆိုခဲ့ကြောင်း နိုင်ငံတော်သမ္မတရုံးက ထုတ်ပြန်ကြေညာပါတယ်။

Author – ဖေသက်ထက်ခင်