နမ့်ဆန်မှာတိုက်ပွဲတွေပြင်းထန်နေလို့ ရွာသူရွာသားတွေဗုံးခိုကျင်းတူးကာနေထိုင်နေရ

ရန်ကုန်၊  ဇန်န၀ါရီ ၁၁ -ရှမ်းပြည်နယ်၊ ပလောင်ဝ်ကိုယ်ပိုင်အုပ်ချုပ်ခွင့်ရဒေသ နမ့်ဆန်မြို့ ဇယန်းကြီးကျေးရွာမှာ မြန်မာတပ်မတော်နဲ့တအာဝ်းတပ်မတော်တို့ နှစ်ဖက်ကြားတိုက်ပွဲတွေပြင်းထန်စွာ ဖြစ်ပွားနေတာကြောင့် နေအိမ်အချို့ ကျောင်းအချို့ပျက်စီးကာ ရွာသူရွာသားတွေ ဗုံးခိုကျင်းတွေတူးပြီးနေ နေရတယ်လို့ တအောဝ်းအရပ်ဘက် အဖွဲ့အစည်းတွေထံက သိရပါတယ်။

မနေ့ည(၉)နာရီမှာ ဖြစ်ပွားခဲ့တဲ့ နှစ်ဖက်တိုက်ပွဲတွေကပြင်းထန်တာကြောင့် ဇယန်းကြီးကျေးရွာဝန်းကျင်က စာသင်ကျောင်းတွေနဲ့ဈေးတွေပါပိတ်ထားရပြီးရွာသူရွာသားတွေကြောက်ရွံ့နေကြတယ်လို့ နမ့်ဆန်မြို့နေထိုင်တဲ့တအာဝ်းလူငယ်အဖွဲ့တာဝန်ခံ မိုင်မျိုးအောင်ကပြောပါတယ်။

သူက” ရွာသား တစ်ယောက် လက်နက်ကြီးထိတယ်ဆိုတော့ပို ကြောက်ကြတာ သူ့ကိုနမ့်ဆန်ဆေးရုံမှာတင်ထားတာ မသက်တာလို့လားရိူးဆေးရုံကိုပို့ဖို့စီစဉ်နေကြတယ်။ သည်မနက်အထိပစ်ခတ်သံတွေ ကြားနေရတုန်းပဲ။ “လို့ပြောပြပါတယ်။

နမ့်ဆန်မြို့ပေါ်ရှိ နတ်စင်ကုန်းရပ်ကွက်မှာလည်း သည်ကနေ့ပစ်ခတ်သံတွေကြားနေရတာကြောင့် မြို့သူမြို့သားတွေနေအိမ်ထဲကနေမထွက်ရဲကြဘဲမြို့တစ်မြို့လုံးတိတ်ဆိတ်ငြိမ်သက်နေတယ်လို့သိရပါတယ်။

နမ့်ဆန်မြို့ဈေးအတွင်းမှာ အထည်ရောင်းချနေတဲ့ နန်းမိုးဝါက “သည်ကနေ့ဈေးမှာ ရောင်းသူရောဝယ်သူပါမရှိသလောက်ရှားတယ် နမ့်ဆန်မြို့ကတောင်ကုန်းပေါ်မှာရှိနေတော့တစ်ခုခုဆိုပြေးဖို့မလွယ်တော့ နေအိမ်တွေထဲမှာပဲနေနေရတယ်။

စစ်တပ်ကလည်းမြို့အနီးတောင်ကုန်းပေါ်ဆိုတော့ လူနေအိမ်တွေထိတာပေါ့ “လို့ပြောပါတယ်။

တအာဝ်းတပ်မတော်တာဝန်ခံ ဗိုလ်မှူးကြီးတာဘုန်းကျော်က သည်ကနေ့ နမ့်ဆန်မြို့နဲ့မန်တုံမြို့နေရာအနှံ့အပြားမှာတိုက်ပွဲများ ဖြစ်ပွားနေပြီး ထိခိုက်ဒဏ်ရာရရှိတာတွေ ကိုတော့ အသေးစိတ်မသိရှိရသေးဘူးလို့ ပြောပါတယ်။

Author  အေးအေးအောင်