တန်ဆောင်မုန်းလ နှင့် မောင်မိုးသူ

တန်ဆောင်မုန်းလဟာ   မောင်မိုးသူရဲ့ ဘဝမှာ အထူးခြားဆုံးဖြစ်ရပ်တွေဖြစ်လေ့ ဖြစ်ထရှိတဲ့ လပဲခင်ဗျ။ ပထမဆုံး မောင်မိုးသူရဲ့ ဘဝခရီးဖော် ဇနီးသည် မအမာနဲ့ တွေ့တာလည်း တန်ဆောင်မုန်းလပြည့်နေ့ပဲ ခင်ဗျ။

မောင်မိုးသူက အထက်တန်းကျောင်းသား၊ ၁၀ တန်းတော့ရောက်နေပြီထင်ပါရဲ့၊   အတိအကျ မသိတော့ဘူး။ ဒါပေမဲ့အမာနဲ့စပြီး တွေ့ဖူးမြင်ဖူးတာ တန်ဆောင်မုန်း ဆိုတာတော့ သေချာတယ်။

တန်ဆောင်မုန်းလ စစ်ကိုင်းတောင်ကထိန်ခင်းတဲ့လ။ မောင်မိုးသူတို့ခေတ် မန္တလေး ရဲ့ထုံးစံကတော့ တန်ဆောင်မုန်းလရဲ့ အဖိတ်နေ့၊ လပြည့်နေ့တွေကို စစ်ကိုင်းတောင် ရိုးပေါ်မှာ အတီးအမှုတ် အကအခုန်တွေနဲ့သွားတဲ့ ရက်တွေပေါ့ခင်ဗျ။     ဘယ်လောက်များ သွားကြသလဲဆိုရင် မြို့လုံးကျွတ်ကိုသွားကြတာမို့ မန္တလေးမြို့ကြီးဟာ ခြောက်ကပ်ပြီးနေလောက်အောင်သွားကြတဲ့ အချိန်ပေါ့ခင်ဗျ။ စစ်ကိုင်းတောင်ရိုးမှာလည်း     တစ်တောင်လုံးခြေချစရာမရှိလောက်အောင် မန္တလေးက လူတွေ လူတွေသွားကြတာ။

မောင်မိုးသူက ဘယ်သူနဲ့သွားသလဲဆိုတော့ စိန်ပီတာကျောင်းက မောင်မိုးသူထက်     တစ်တန်းကြီးတဲ့ မောင်ကြည်စန်းနဲ့ နှစ်ယောက်သွားကြတာ။ မောင်မိုးသူ အမြဲ သွားသွားနေတဲ့ ဓာတ်နန်းဆိုတာမလွန်နဲ့သိပ်နီးတာ။  မလွန်ဆန်လှူအသင်းဆိုတာ မန္တ လေးတစ်မြို့လုံးရဲ့ အသင်းလေ။ အဲသည် မလွန်ဆန်လှူအသင်းရဲ့ စစ်ကိုင်းတောင်     ကထိန်ပွဲကို သူငယ်ချင်းဖြစ်သူ မောင်ကြည်စန်းနဲ့ သွားကြတာ။

မောင်ကြည်စန်းက မောင်မိုးသူထက်တစ်တန်းပဲကြီးပေမဲ့ ရွယ်တူဆိုတော့ အခုသူလည်း   ၈၀ ရှိလောက်ပြီပေါ့။ အခုတော့ သူလည်း ဆရာဝန်ကြီးတစ်ယောက်ဖြစ်နေပါပြီ။     မောင်မိုးသူနဲ့ စစ်ကိုင်းတောင်ကထိန်ကို အတူလိုက်ပါမိလို့လားမသိပါဘူး အခုတော့     စစ်ကိုင်းကသီတဂူဆေးရုံကြီးမှာ ကုသိုလ်ဖြစ် ဆရာဝန်ကြီးလုပ်နေတယ်ဆိုပဲ။

အဲစောစောကပြောခဲ့ပြီးပြီနော်။ တန်ဆောင်မုန်း ကထိန်ခင်းဖို့မလွန်ဆန်လှူ အသင်းကြီး နဲ့သွားကြတာခင်ဗျ။ သွားကြတာကလည်း သင်္ဘောကြီးနဲ့ခင်ဗျ။ အဲသည်သင်္ဘောပေါ်မှာပဲ     ဖျတ်ခနဲ မောင်မိုးသူ အမာကိုမြင်လိုက်ရတာ။ အမာက သူ့အဒေါ်ဈေးသည်တွေနဲ့       လိုက်လာတာ။ မောင်မိုးသူတို့တစ်တွေအားလုံး   ဝါးချက်ဆိပ်ကမ်းမှာ သင်္ဘောကြီး   ကပ်ပြီးဆိပ်ကမ်းက ဓမ္မာရုံကြီးထဲမှာ အားလုံးစုတည်းကြတာ။ ၁၄ ရက်နေ့ည အဲသည်      ဓမ္မာရုံမှာအတူအိပ်ကြတယ်ဆိုပေမဲ့ ဘယ်သူမှမအိပ်ကြပါဘူး။ စစ်ကိုင်းတောင်ရိုးတစ် လျှောက်လုံးတစ်ညလုံး အတီးအမှုတ် အကအခုန်တွေနဲ့လုပ်ကြတာ။   မောင်မိုးသူကတော့ အမာတို့အဖွဲ့သွားရာနောက်တကောက်ကောက်ပေါ့ခင်ဗျာ။   အသိအကျွမ်းလည်းဖြစ်သွားပါတယ်။ အမာတို့အဒေါ်တွေဈေးထွက်တာကလည်း မောင် မိုးသူ့အရီး(အဖေ့အစ်မ)တို့ ထွက်တဲ့ ဈေးချိုမှာပဲခင်ဗျ။

အဲသည်လို   တန်ဆောင်မုန်းအဖိတ်နေ့ညမှာတွေ့ခဲ့တဲ့ မအမာကို လပြည့်ကျော်လို့   အမျိုးသားအောင်ပွဲနေ့မှာ ပြန်ဆုံပါတယ်။ အမျိုးသားအောင်ပွဲနေ့မှာ အထက်တန်း   ကျောင်းသားကျောင်းသူတွေ အားလုံးအမျိုးသားအောင်ပွဲနေ့ဆိုပြီးစီတန်းလမ်းလျှောက်ကြ တယ်ခင်ဗျ။ အမာလည်းကျောင်းသူဆိုတော့ စီတန်းလှည့်ရာမှာပါပါတယ်။   မောင်မိုးသူက စီတန်းလှည့်လည်တဲ့ အမာရဲ့ဓာတ်ပုံတွေအများကြီးရိုက်ဖူးပါတယ်။   အမာကလည်း ဓာတ်ပုံအရိုက်ခံဖို့ ဝါသနာပါ၊ ချောလည်းချောတာကိုး။ မောင်မိုးသူက လည်း ဓာတ်ပုံရိုက်တာ ဝါသနာပါလို့ဓာတ်ပုံတွေအများကြီး ကိုယ်တိုင်လည်းရိုက်ဖူး၊   ဓာတ်ပုံ ဆရာများနဲ့လည်းရိုက်ဖူးပါတယ်။

မောင်မိုးသူရဲ့ ပထမဆုံးထွက်တဲ့ လုံးချင်းဝတ္ထုအဖုံးက ဓာတ်ပုံရှင်ဟာ အမာဖြစ်ပါတယ်။   ဓာတ်ပုံဆရာကတော့ ကိုခင်မောင်လေးပါ။ ကိုခင်မောင်လေးတို့ အမာတို့တော့         မရှိကြတော့ပါဘူး။ အမာရဲ့နောက်ထပ် စာအုပ်မျက်နှာဖုံးကတော့ မောင်မိုးသူရဲ့     မိုးဦးပန်းစာအုပ်တိုက်ကထုတ်တဲ့ သိန်းသန်းထွန်းရဲ ပထမဆုံးလုံးချင်းဝတ္ထု မပန်ပါနဲ့   ကြွေချင်တယ်၊ ဝတ္ထုအဖုံးပါပဲ။ အမာပန်းကလေးကိုင်ပြီးလဲလျောင်းနေတဲ့ပုံကို ရိုက်ထား တာပါ။ အဲသည်မျက်နှာဖုံးက မပန်ပါနဲ့ကြွေချင်တယ်၊သိန်းသန်းထွန်းဆိုတဲ့စာလုံးတွေကို   မောင်မိုးသူကိုယ်တိုင် ရေးခဲ့တာပါပဲ။လက်ရေးကတော့ တက္ကသိုလ်မှာကြမ်းလာခဲ့တဲ့     လက်ဝဲလက်ရေးစာလုံးပေါ့။

မောင်မိုးသူရဲ့ဘဝမှာ ထူးထူးခြားခြား တန်ဆောင်မုန်းလမှာ မွေးကြသူနှစ်ဦးရှိပါတယ်။   တစ်ဦးကတော့ လူထုဒေါ်အမာပေါ့ခင်ဗျာ။ ဒေါ်ဒေါ်က တန်ဆောင်မုန်းလမှာမွေးတာ ခင်ဗျ။ ဒေါ်ဒေါ်ရဲ့ ၇၀ ပြည့်မွေးနေ့တွေကို အမရပူရတောင်လေးလုံးမှာ နှစ်စဉ်ကျင်းပလို့   မောင်မိုးသူလည်းနှစ်တိုင်းရောက်ပေါ့။ ၁၉၉၀ တန်ဆောင်မုန်းကျတော့ မောင်မိုးသူက   ထောင်ထဲမှာ ဦးဝင်းတင်နဲ့အတူ အထူးတိုက်ထဲမှာရောက်နေပါတယ်။ ဦးဝင်းတင်က   ဒေါ်ဒေါ့်မွေးနေ့အတွက် အင်မတန်ကောင်းတဲ့ ကဗျာလေးတစ်ပုဒ်ရေးပါတယ်။

ခြေတစ်လှမ်း   ကျမ်းတစ်စောင်

ရွှေဒေါင်းတောင် စိန်ကလောင်နှင့်

တောင်ကိုဖြိုမယ့် မြစ်တစ်စင်း ပါတဲ့။

ကောင်းလိုက်တဲ့ ကဗျာပေါ့ခင်ဗျာ။ ကိုဝင်းတင် ရွတ်ပြတာအားကျပြီး နှစ်ပေါင်းများစွာ     ကဗျာရေးခြင်းအလုပ်ကို စွန့်လွှတ်ခဲ့တဲ့ မောင်မိုးသူလည်း ဒေါ်ဒေါ့်မွေးနေ့မလာရောက် နိုင်တဲ့အကြောင်း ကဗျာအရှည်ကြီးရေးဖြစ်ပါတယ်။

အောင်မယ် ကဗျာကိုစိတ်နဲ့ရေးရတာခင်ဗျ။ မောင်မိုးသူတို့ ဦးဝင်းတင်တို့ကစာရွက်၊   ဘောလ်ပင်မကိုင်ရပါ။ မောင်မိုးသူ အဲသည်အလွမ်းစာဆိုတဲ့ ကဗျာအရှည်ကို     စိတ်နဲ့ရေး အလွတ်ကျက်ပြီး   အပြင်ရောက်မှပြန်ရေးရတာ။

ဒေါ်ဒေါ်မွေးနေ့ကို မတက်နိုင်တဲ့မောင်မိုးသူဘဝပေါ့။ မောင်မိုးသူ အခုရောက်နေတာက       ဘယ်ကိုလှမ်းလှမ်း ခုနစ်လှမ်းပဲလှမ်းလို့ရတဲ့ အထူးတိုက်ထဲမှာရောက်နေကြောင်း၊     လူကိုထောင်ထဲ ထည့်ထားလို့ရပေမဲ့ စိတ်ကိုတော့ထည့်လို့မရတော့ ဒေါ်ဒေါ့်မွေးနေ့မှာ     သူငယ်ချင်းတွေနဲ့အတူ ရောက်နေမှာလို့ရေးခဲ့တယ်ခင်ဗျ။ အဲသည်ကဗျာထဲမှာ တန် ဆောင်မုန်းလမှာမွေးတဲ့ သားငယ် ညီညီမိုးသူအကြောင်းလည်းပါတယ်ခင်ဗျ။ မင်းအမေ   အမာနဲ့ ငါတန်ဆောင်မုန်းလ စစ်ကိုင်းတောင်မှာတွေ့ခဲ့တာပေါ့လို့ ရေးထားသကိုး။

တန်ဆောင်မုန်းလက မောင်မိုးသူအတွက်အမှတ်ရစရာများလှပေါ့။     ဒေါ်ဒေါ်ကွယ်လွန်ပြီးမှ မွေးနေ့တစ်နှစ်လား နှစ်နှစ်လားမွေးနေ့ပွဲတွေမန္တလေးကို   ဆင်းနိုင်ခဲ့ပေမဲ့ နောက်နှစ်များမှာတော့ မသွားနိုင်တော့ပါဘူး။တန်ဆောင်မုန်းလမှာ   ထူးခြားတဲ့ဖြစ်ရပ်နှစ်ခုရှိပါတယ်။ ပါတော်မူနေ့နဲ့ အမျိုးသားအောင်ပွဲနေ့ပေါ့။ ပါတော်မူ နေ့ဆိုတာ မြန်မာဘုရင် သီပေါမင်းပါသွားတဲ့နေ့။ ဘာဖြစ်လို့ပါရသလဲဆိုတော့     မြန်မာနိုင်ငံက နန်းတွင်းရေးရာတွေမှာ မညီညွတ်ကြလို့ မညီညွတ်မှုရဲ့သင်္ကေတဟာ     ပါတော်မူနေ့ပါပဲ။

အမျိုးသားအောင်ပွဲနေ့ကတော့ ညီညွတ်ခြင်းရဲ့ သင်္ကေတဖြစ်ပါတယ်။ ဒါကြောင့်လည်း     အမျိုးသားအောင်ပွဲနေ့ဆိုပြီး မောင်မိုးသူတို့တစ်တွေကျင်းပနေကြရတာပေါ့။

တန်ဆောင်မုန်းလမှာ မညီညွတ်ခြင်းရဲ့ သင်္ကေတပါတော်မူနေ့ရှိသလို ညီညွတ်ခြင်းရဲ့     သင်္ကေတ အမျိုးသားအောင်ပွဲနေ့လည်း ရှိတယ်ခင်ဗျ။

တန်ဆောင်မုန်းလနှင့် မောင်မိုးသူပါ။

မောင်မိုးသူ